തിരുവനന്തപുരം : സ്വര്ണക്കടത്ത് കേസിലെ പ്രതികളെ കേരള നിയസഭ സ്പീക്കര് പി. ശ്രീരാമകൃഷ്ണന് സഹായിച്ചത് ഞെട്ടിപ്പിക്കുന്നുവെന്ന് ബിജെപി സംസ്ഥാന പ്രസിഡന്റ് കെ. സുരേന്ദ്രന്. സ്വര്ണക്കടത്ത് കേസിലെ മുഖ്യപ്രതികളെ മുഖ്യമന്ത്രിയും മന്ത്രിമാരും സ്പീക്കറും സഹായിച്ചിരുന്നുവെന്നത് കേരളത്തിന് അപമാനമാണ്. അധോലോക സംഘങ്ങളെ സഹായിക്കാന് നോതാക്കള് പദവികള് ദുരുപയോഗം ചെയ്തു. അനുമതിയില്ലാതെ സ്പീക്കര് നടത്തിയ വിദേശയാത്രകള് പലതും ദുരൂഹമാണ്. എറണാകുളം പ്രസ്ക്ലബ്ബിന്റെ ആഭിമുഖ്യത്തില് മീറ്റ് ദ പ്രസില് പങ്കെടുത്ത് സംസാരിക്കുകയായിരുന്നു കെ. സുരേന്ദ്രന്.
ഇടതു-വലതു മുന്നണികളുടെ ഭരണത്തില് മടുത്ത ജനം എന്ഡിഎയ്ക്ക് അനുകൂലമായി വിധി എഴുതും. കൊറോണയുള്ള സാഹചര്യത്തില് ഒന്നാംഘട്ട തെരഞ്ഞെടുപ്പ് പുരോഗമിക്കുമ്പോള് കനത്ത പോളിങ് നടക്കുന്നത് സര്ക്കാരിനെതിരായ ജനരോഷമാണ്. സ്വര്ണക്കടത്ത് കേസുമായി ബന്ധപ്പെട്ട് ഞെട്ടിക്കുന്ന വിവരങ്ങളാണ് പുറത്തുവരുന്നതെന്ന് കോടതിവരെ പറഞ്ഞ സാഹചര്യമുണ്ടായി. മുഖ്യമന്ത്രി പിണറായി വിജയനും അദ്ദേഹത്തിന്റെ ഓഫീസിനും നേരിട്ട് പങ്കുണ്ടെന്ന് ബിജെപി നേരത്തെ തന്നെ പറഞ്ഞിരുന്നു. എന്നാല് ഇതിനുത്തരം നല്കാന് സര്ക്കാരും സിപിഎമ്മും തയാറാകുന്നില്ല. അഴിമതിയെ പ്രതിരോധിക്കുന്നതില് പ്രതിപക്ഷം പരാജയപ്പെട്ടുവെന്നും അദ്ദേഹം ചൂണ്ടിക്കാട്ടി.
വികസനത്തെക്കുറിച്ച് സംസാരിക്കാന് ഇരുമുന്നണികള്ക്കും അവകാശമില്ല. അഴിമതി കേസില് കെ. ബാബു രക്ഷപ്പെട്ടത് എല്ഡിഎഫിന്റെ ഔദാര്യം കൊണ്ടാണ്. സ്വര്ണ്ണക്കടത്ത് കേസിലെ ഉന്നതന് ആരാണെന്ന് ഇപ്പോള് പറയുന്നില്ല. കോടതിയുടെ മുമ്പിലുള്ള കേസില് നിയമപരമായി പേരുകള് പുറത്തുവരുന്നതാണ് നല്ലത്. രാഷ്ട്രീയ നേട്ടങ്ങള്ക്ക് വേണ്ടിയല്ല കേരളത്തിന്റെ താത്പര്യങ്ങള് സംരക്ഷിക്കാനാണ് ബിജെപി ശ്രമിക്കുന്നത്. ജനങ്ങളുടെ ക്ഷേമപ്രവര്ത്തനങ്ങള്ക്കാണ് പാര്ട്ടി മുന്തൂക്കം കൊടുക്കുന്നതെന്നും അദ്ദേഹം പറഞ്ഞു.
അതേസമയം സര്ക്കാര് സംവിധാനം ദുരുപയോഗിച്ചാണ് കള്ളക്കടത്ത് സംഘം പ്രവര്ത്തിച്ചതെന്ന ബി.ജെ.പിയുടെ ആരോപണം ശരി വെക്കുന്നതാണ് പുതിയ സംഭവ വികാസങ്ങള് എന്ന് സുരേന്ദ്രന് നേരത്തെ പറഞ്ഞിരുന്നു. ഭരണ സംവിധാനമാകെ സ്വര്ണ്ണക്കടത്തിന് കൂട്ടുനിന്ന ഞെട്ടിപ്പിക്കുന്ന വിവരങ്ങളാണ് സീല് വെച്ച കവറില് കസ്റ്റംസ് കോടതിയില് സമര്പ്പിച്ചത്. പ്രതികളുടെ രഹസ്യമൊഴി പുറത്തു വരുമ്പോള് മുഖ്യമന്ത്രിക്കും ചില മന്ത്രിമാര്ക്കും ഭരണഘടനയുടെ തലപ്പത്തിരിക്കുന്നവര്ക്കും രാജിവെക്കേണ്ടി വരുമെന്നും ഒരു ഭരണ സംവിധാനം പൂര്ണ്ണമായും ഉപയോഗപ്പെടുത്തിയാണ് അന്താരാഷ്ട്ര സ്വര്ണ്ണക്കടത്ത് നടത്തിയതെന്നും അദ്ദേഹം ആരോപിച്ചിരുന്നു.
Discussion about this post