കോഴിക്കോട്: സ്വര്ണക്കടത്ത് കേസിലെ പ്രതി ഫൈസല് ഫരീദിന് സിനിമാ മേഖലയുമായുള്ള ബന്ധം അന്വേഷിക്കണമെന്ന് ബിജെപി സംസ്ഥാന ജനറല് സെക്രട്ടറി എം.ടി.രമേശ്. സിനിമാ ദമ്പതികള്ക്ക് ബന്ധമുണ്ടെന്ന് ഫൈസലുമായി ബന്ധമുണ്ടെന്ന് ആഷിഖ് അബുവിനെയും റിമ കല്ലിങ്കലിനെയും പരോക്ഷമായി സൂചിപ്പിച്ച് അദ്ദേഹം പറഞ്ഞു. സിനിമാ ദമ്പതികളുടെ ഫോര്ട്ട്കൊച്ചിയിലെ സ്ഥാപനത്തില് ഫൈസല് ഫരീദ് സന്ദര്ശകനാണെന്ന വിവരവും പുറത്തു വന്നിട്ടുണ്ട്. പുതുതലമുറ സംവിധായകരുമായും പഴയ തലമുറയിലെ ഒരു പ്രമുഖ സംവിധയാകനുമായും ഫരീദിന് അടുത്ത ബന്ധമുണ്ട്. ഇതേപ്പറ്റി അമ്മ അടക്കമുള്ള സിനിമാ മേഖലയിലെ സംഘടനകള് മറുപടി പറയണം. ചില സംവിധായകര് ഫരീദിന്റെ ബെനാമികളാണെന്ന ആക്ഷേപവുമുണ്ട്.
സമീപ കാലത്ത് ഇറങ്ങിയ ഇടതുപക്ഷത്തെ പ്രകീര്ത്തിക്കുന്ന സിനിമകള്, സംസ്ഥാനത്തെ ഒരു മന്ത്രിയെ പുകഴ്ത്തിയ സിനിമ എന്നിവയൊക്കെ സ്വര്ണക്കടത്ത് പണം ഉപയോഗിച്ച് നിര്മിച്ചവയാണെന്ന് ആക്ഷേപമുണ്ട്. സിനിമാ മേഖലയില് ഉള്ളവര് പങ്കെടുത്ത സിഎഎ വിരുദ്ധ സമരത്തിന് പണം മുടക്കിയതും ഫൈസല് ഫരീദാണ്. സമരത്തിനു ശേഷം നടന്ന പാര്ട്ടിയെപ്പറ്റിയും അന്വേഷണം നടത്തണം. കേരളത്തില് നടന്ന ഇന്ത്യാ വിരുദ്ധ സമരങ്ങളുടെ സ്പോണ്സറും ഇയാളാണെന്നും രമേശ് പറഞ്ഞു.
യുഎഇ കോണ്സുല് ജനറലിന്റെ ഗണ്മാനായി ജയഘോഷിനെ പുനര്നിയമിക്കുന്നതുമായി ബന്ധപ്പെട്ട് ഡിജിപി ലോക്നാഥ് ബെഹ്റ നയതന്ത്ര നിയമങ്ങള് ലംഘിച്ചുവെന്ന് രമേശ് കുറ്റപ്പെടുത്തി. ജയഘോഷിനെ തന്നെ ഗണ്മാനായി വേണമെന്ന് അറ്റാഷെ ആവശ്യപ്പെട്ടോയെന്ന് ഡിജിപി വ്യക്തമാക്കണം. ഇതു സംബന്ധിച്ച എല്ലാ കത്തിടപാടുകളും പുറത്തുവിടണം. നയതന്ത്ര നിയമങ്ങള് ലംഘിച്ച ഡിജിപിയെ പുറത്താക്കാന് മുഖ്യമന്ത്രി തയാറാകണമെന്നും എം.ടി. രമേശ് ആവശ്യപ്പെട്ടു.
Discussion about this post