ന്യൂഡല്ഹി: യുഎഇ കോണ്സുലേറ്റ് വഴിയുള്ള സ്വര്ണക്കടത്തില് കള്ളപ്പണം വെളുപ്പിച്ചതിന് എന്ഫോഴ്സ്മെന്റ് ഡയറക്ടറേറ്റ് കേസ് രജിസ്റ്റര് ചെയ്തു. വിഷയത്തില് അന്വേഷണം നടത്തുന്ന മൂന്നാമത്തെ ഏജന്സിയാണ് ഇഡി. കസ്റ്റംസും എന്ഐഎയും അന്വേഷണം നടത്തിവരികയാണ്. ഇതില്നിന്നും വ്യത്യസ്തമാകും ഇഡിയുടേത്. പ്രതികളുടെ സ്വത്ത് കണ്ടുകെട്ടാന് ഇഡിക്ക് സാധിക്കും. പണമൊഴുക്കിയ ഷെല് കമ്പനികളെക്കുറിച്ചും അന്വേഷിക്കും. എന്ഐഎ നാലും കസ്റ്റംസ് പതിമൂന്നും പ്രതികളെ ഇതിനകം അറസ്റ്റ് ചെയ്തിട്ടുണ്ട്.
പ്രതിയായ സ്വപ്ന സുരേഷിന്റെ ബാങ്ക് അക്കൗണ്ടുകളില് വന് നിക്ഷേപമുള്ളതായി എന്ഐഎ അന്വേഷണ കോടതിയില് സമര്പ്പിച്ച റിമാന്ഡ് റിപ്പോര്ട്ടില് വ്യക്തമാക്കിയിരുന്നു. വിവിധ ബാങ്കുകളിലായാണു സ്വര്ണവും മറ്റു നിക്ഷേപിച്ചിട്ടുള്ളത്. രാജ്യത്തിന്റെ സാമ്പത്തിക ഭദ്രത തകര്ക്കുകയായിരുന്നു പ്രതികളുടെ ലക്ഷ്യമെന്നും എന്ഐഎ പറയുന്നു.
സ്വര്ണക്കടത്തില് മുഖ്യകണ്ണി കെ.ടി.റമീസാണെന്നാണ് വ്യക്തമാകുന്നതെന്ന് എന്ഐഎ റിപ്പോര്ട്ടില് പറയുന്നു. റമീസിനു വിദേശത്ത് ഉള്പ്പടെ വന്കള്ളക്കടത്ത് റാക്കറ്റുമായി ബന്ധമുണ്ട്. റമീസിന്റെ നിര്ദേശം അനുസരിച്ചാണ് ഇപ്പോള് കസ്റ്റഡിയിലുള്ള പ്രതികള് നീങ്ങിയത്. ഗൂഢാലോചനയുടെ കൂടുതല് വിവരങ്ങള് പുറത്തുവരാനുണ്ട്. ലോക്ഡൗണ് മറയാക്കി കൂടുതല് സ്വര്ണം കടത്താന് റമീസ് നിര്ബന്ധിച്ചതായാണ് സ്വപ്നയും സരിത്തും പറയുന്നത്.
സ്വര്ണക്കടത്തില് സാമ്പത്തിക ഇടപാടുകള് നടത്തിയിരുന്നത് റമീസും ജലാല് എന്നയാളുമാണ്. റമീസിനെ കേസില് പ്രതിചേര്ക്കാന് നടപടി തുടങ്ങി. സ്വപ്നയില്നിന്ന് മൊബൈല് ഫോണുകളും ലാപ്ടോപ്പും പിടിച്ചെടുത്തു. ഇത് പ്രതികളുടെ സാന്നിധ്യത്തില് തുറന്നു പരിശോധിച്ചു. ഇവരുടെ സമൂഹമാധ്യമ അക്കൗണ്ടുകളും വിശകലനം ചെയ്തു. പ്രതികള് ടെലിഗ്രാം ആപ് വഴിയായിരുന്നു ആശയവിനിമയം നടത്തിയിരുന്നത്. പിടിയിലാകും മുമ്പ് സ്വപ്ന ഫോണിലെ സന്ദേശങ്ങള് നീക്കം ചെയ്തിരുന്നു. ഇതു സിഡാക്കിന്റെ സഹായത്തോടെ വീണ്ടെടുത്തിട്ടുണ്ടെന്നും എന്ഐഎ കോടതിയെ അറിയിച്ചു.
Discussion about this post