തിരുവനന്തപുരം : ഇന്ത്യ കണ്ട ഏറ്റവും വലിയ അഴിമതിക്കാരനായ മുഖ്യമന്ത്രി പിണറായി വിജയനാണെന്ന് ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന്. വലിയ അഴിമതി നടന്നതു കൊണ്ടാണ് കിഫ്ബിയുടെ കാര്യത്തില് മുഖ്യമന്ത്രി ജനങ്ങളെ ആവര്ത്തിച്ച് തെറ്റിദ്ധരിപ്പിക്കുന്നതെന്ന് അദ്ദേഹം തിരുവനന്തപുരത്ത് നടന്ന വാര്ത്താസമ്മേളനത്തില് ആരോപിച്ചു.
കേന്ദ്ര സര്ക്കാര് സി.എ.ജിയെ ഉപയോഗിച്ച് രാഷ്ട്രീയം കളിക്കുകയാണെന്ന മുഖ്യമന്ത്രിയുടെ ആരോപണം ഭരണഘടനയെ കുറിച്ചുള്ള അജ്ഞതയാണ്. ഇതുവരെ ഒരു പ്രതിപക്ഷവും ഉന്നയിക്കാത്ത കാര്യങ്ങള് പിണറായി വിജയന് പറയുന്നത് പരിഹാസ്യമാണ്. കരടിലില്ലാത്ത കാര്യങ്ങള് റിപ്പോര്ട്ടില് ഉണ്ടെന്നാണ് മുഖ്യമന്ത്രി പറയുന്നത്. നിയമസഭയില് വെക്കേണ്ട സി.എ.ജി റിപ്പോര്ട്ട് എങ്ങനെയാണ് മുഖ്യമന്ത്രി കാണുക? അങ്ങനെ കണ്ടെങ്കില് അത് സത്യപ്രതിജ്ഞാലംഘനമാണെന്നും സുരേന്ദ്രന് പറഞ്ഞു.
കിഫ്ബി ഓഡിറ്റിംഗില് പ്രശ്നമില്ലെങ്കില് ഇപ്പോള് എന്തിനാണ് മുഖ്യമന്ത്രിയും ധനമന്ത്രിയും ഉറഞ്ഞു തുള്ളുന്നത്. മുഖ്യമന്ത്രി സംസ്ഥാന സര്ക്കാര് പദ്ധതികളെല്ലാം അഴിമതി നടത്താനുള്ള ഉപാധിയാക്കുകയാണ്. സി.എം രവീന്ദ്രനെയും പുത്തലത്ത് ദിനേശനെയും അന്വേഷണ ഏജന്സികള് ചോദ്യം ചെയ്താല് കേരളത്തിലെ പല അഴിമതികളും പുറത്തുവരും. മുഖ്യമന്ത്രിയുടെ ഓഫീസ് കേന്ദ്രീകരിച്ചാണ് വലിയ അഴിമതികളെല്ലാം നടന്നതെന്ന് അദ്ദേഹം ആരോപിച്ചു.
സിഎജിയുടെ ചോദ്യങ്ങള്ക്ക് ഭരണഘടനാപരമായി മറുപടി നല്കുകയാണ് സംസ്ഥാനം ചെയ്യേണ്ടത്. എന്നാല് റിപ്പോര്ട്ട് പൊളിച്ചുനോക്കി അത് രാഷ്ട്രീയ പ്രചരണമാക്കുന്നത് അഴിമതി നടന്നതു കൊണ്ടാണെന്നും സുരേന്ദ്രന് ചൂണ്ടിക്കാട്ടി. കിഫ്ബിയെ അല്ല ബി.ജെ.പി എതിര്ക്കുന്നത്. കിഫ്ബിയില് ഐസക്ക് അഴിമതി നടത്തിയെന്നും മസാല ബോണ്ടില് ക്രമക്കേട് നടന്നുവെന്നുമാണ് ബിജെപി ചൂണ്ടിക്കാണിച്ചതെന്ന് സുരേന്ദ്രന് വ്യക്തമാക്കി.
തിരഞ്ഞെടുപ്പ് കാലത്തെ മുഖ്യമന്ത്രിയുടെ വാര്ത്താസമ്മേളനത്തിന് മാദ്ധ്യമങ്ങള് അമിതപ്രാധാന്യം നല്കുന്നത് ശരിയല്ലെന്നും കോവിഡിന്റെ മറവില് മുഖ്യമന്ത്രി രാഷ്ട്രീയമാണ് പറയുന്നതെന്നും അദ്ദേഹം പറഞ്ഞു. കേന്ദ്രസര്ക്കാര് സി.എ.ജിയെ ഉപയോഗിച്ച് കേരളത്തിന്റെ വികസനം അട്ടിമറിക്കുകയാണെന്നാണ് മുഖ്യമന്ത്രി പറയുന്നത്. കഴിഞ്ഞ മാസം 50,000 കോടി രൂപ ദേശീയപാത വികസനത്തിന് നിതിന് ഗഡ്ക്കരി തന്നെന്നു പറഞ്ഞ പിണറായി ഇപ്പോള് മാറ്റി പറയുന്നത് വെറും രാഷ്ട്രീയമാണ്. ഏത് കാര്യത്തിലാണ് കേന്ദ്രം കേരളത്തെ അവഗണിച്ചതെന്ന് പിണറായി വിജയന് വ്യക്തമാക്കണമെന്നും ബിജെപി സംസ്ഥാന പ്രസിഡന്റ് ആവശ്യപ്പെട്ടു.
8 മന്ത്രിമാര് കേരളത്തില് നിന്നുണ്ടായിരുന്ന യു.പി.എ സര്ക്കാരിനേക്കാള് കേരളത്തെ സഹായിക്കുന്നത് മോദി സര്ക്കാരാണെന്ന് പറഞ്ഞത് മന്ത്രി ജി.സുധാകരനാണ്. കേരളത്തിന്റെ വികസനത്തിന് എത്ര പണം കേന്ദ്രം തന്നെന്ന് മുഖ്യമന്ത്രി പറയണമെന്നും സുരേന്ദ്രന് പറഞ്ഞു.
Discussion about this post