പാലക്കാട്: ഊരാളുങ്കല് ലേബര് കോണ്ട്രാക്ട് സൊസൈറ്റി മുഖ്യമന്ത്രിയുടേയും സി.പി.എമ്മിന്റെയും മറയാണെന്ന് ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന്. മുഖ്യമന്ത്രിയുമായും സിപിഎമ്മുമായും അടുത്ത ബന്ധമുള്ള സ്ഥാപനത്തിലാണ് ഇ.ഡിയുടെ റെയിഡ് നടന്നിരിക്കുന്നതെന്നും പാലക്കാട് നടന്ന വാര്ത്താസമ്മേളനത്തില് അദ്ദേഹം പറഞ്ഞു.
ഒരുതരത്തിലുള്ള ടെന്ഡര് മാനദണ്ഡങ്ങളും പാലിക്കാതെയാണ് നൂറൂകണക്കിന് കോടിയുടെ കരാര് ഊരാളുങ്കലിന് നല്കിയത്. കള്ളപ്പണം വെളുപ്പിക്കാനുള്ള സി.പി.എമ്മിന്റെ എളുപ്പവഴിയാണ് ഇത്തരത്തിലുള്ള കരാറുകള്. ഊരാളുങ്കല് ലേബര് കോണ്ട്രാക്ട് സൊസൈറ്റിയുമായി ബന്ധപ്പെട്ട ഇടപാടുകള് ഇതുവരെ പുറത്ത് വന്ന അഴിമതി കഥകളേക്കാള് വലുതാണ്. ഊരാളുങ്കലിന് പിണറായി ഭരണത്തില് ലഭിച്ച കരാറുകളുടെ വിശദാംശങ്ങള് പുറത്ത് വിടണമെന്നും സുരേന്ദ്രന് ആവശ്യപ്പെട്ടു.
മുഖ്യമന്ത്രി പിണറായി വിജയനും കൊടിയേരി ബാലകൃഷ്ണനും തദ്ദേശ തിരഞ്ഞെടുപ്പില് പ്രചരണത്തിനിറങ്ങാന് പറ്റാത്ത സാഹചര്യമാണുള്ളത്. മുഖ്യമന്ത്രി പ്രചരണത്തിനിറങ്ങാത്തത് അഴിമതിയില് അദ്ദേഹത്തിന്റെ പ്രതിച്ഛായ തകര്ന്നത് കൊണ്ടാണ്. പിണറായി പ്രചരണത്തിന് ഇറങ്ങിയാല് ജയിക്കില്ലെന്ന് സ്ഥാനാര്ത്ഥികള്ക്കുമറിയാം. കേന്ദ്ര നേതൃത്വം കൊടിയേരിയെ കൈവിട്ടത് പോലെ പിണറായിയേയും കൈവിട്ടു കഴിഞ്ഞു. സ്വന്തം പാര്ട്ടിയിലെ നേതാക്കള്ക്ക് പോലും വിശ്വാസമില്ലാത്ത മുഖ്യമന്ത്രി ഇനിയും അധികാരത്തില് കടിച്ചുതൂങ്ങുന്നത് സിപിഎമ്മിനെ സംബന്ധിച്ചിടത്തോളം ആത്മഹത്യപരമാണ്. മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം.ശിവശങ്കരന് വിമാനത്താവളം വഴി മാത്രമല്ല കടല് വഴിയും സ്വര്ണ്ണക്കടത്ത് നടത്തിയെന്നാണ് അന്വേഷണ ഏജന്സികള് പറയുന്നത്. അഡീഷണല് സെക്രട്ടറി സി.എം രവീന്ദ്രനെ ചോദ്യം ചെയ്യുന്നതോടെ മുഖ്യമന്ത്രിയുടെ എല്ലാ പ്രതിരോധവും തകരുമെന്നും സുരേന്ദ്രന് പറഞ്ഞു.
കേന്ദ്ര ഏജന്സികള് രാഷ്ട്രീയം കളിക്കുകയാണെന്ന് പറഞ്ഞിരുന്ന തോമസ് ഐസക്ക് ഇപ്പോള് വിജിലന്സിനെതിരെ തിരിഞ്ഞിരിക്കുകയാണ്. കേന്ദ്ര ഏജന്സികള് കേരളത്തിനെതിരാണെന്ന് പറഞ്ഞ അദ്ദേഹം വിജിലന്സും കേരളത്തിനെതിരാണോയെന്ന് വ്യക്തമാക്കണമെന്നും കെ.എസ്.എഫ്.ഇയില് മാത്രമല്ല കേരള ഫിനാന്ഷ്യല് കോര്പ്പറേഷനിലും അഴിമതി നടന്നുവെന്നും അദ്ദേഹം ആരോപിച്ചു.
കേരളത്തിലെ ഒരു ചാനലിന് 7 കോടി വായ്പ്പയാണ് ഫിനാന്ഷ്യല് കോര്പ്പറേഷന് നല്കിയത്. എന്നാല് ഇത് തിരിച്ച് അടയ്ക്കാതിരുന്നപ്പോള് അതിനുനേരെ കണ്ണടയ്ക്കുകയായിരുന്നു കോര്പ്പറേഷന്. പ്രവാസി ചിട്ടിയിലും വലിയ തട്ടിപ്പാണ് നടന്നത്. പിണറായി വിജയന് വട്ടാണെന്ന് ധനമന്ത്രി പറഞ്ഞതോടെ മന്ത്രിസഭയുടെ കൂട്ടുത്തരവാദിത്വം നഷ്ടപ്പെട്ടുവെന്നും സുരേന്ദ്രന് പറഞ്ഞു.
വിദ്യാഭ്യാസ മന്ത്രിയുടെ മണ്ഡലമായ ചെമ്പൂച്ചിറയില് മാത്രമല്ല കേരളത്തിലങ്ങിങ്ങോളം കിഫ്ബിയില് പണിതീര്ത്ത സ്കൂളുകളെല്ലാം തകര്ന്ന് വീഴാന് പോവുന്നതാണ്. തോമസ് ഐസക്കിന്റെ എല്ലാ പദ്ധതിയിലും അഴിമതിയാണ്. വിദേശത്ത് നിന്നും വായ്പ്പ വാങ്ങിയതില് തട്ടിപ്പ് അത് നിര്മ്മിക്കുന്നതിലും തട്ടിപ്പ് എന്നതാണ് കിഫ്ബിയുടെ അവസ്ഥ. സ്കൂള് കുട്ടികളുടെ ജീവന് വെച്ചാണ് ഇപ്പോള് കളിക്കുന്നത്. വിജിലന്സ് പരിശോധിക്കുന്നതിന് മുമ്പ് മന്ത്രിയോട് ചോദിക്കണം എന്ന് പറയുന്നത് എന്ത് നിയമത്തിന്റെ അടിസ്ഥാനത്തിലാണെന്നും സുരേന്ദ്രന് ചോദിച്ചു.
Discussion about this post